Related Stories
ALANG SA LALAKE
Ang batang lalake nga mahimugso dungan sa pagsubang sa Bitoon Virgo. Mahimong tinamud sa katilingban. Kaaway sa mga butang hilas. Siya malipay kon ang iyang mga silingan, magasubay sa kalinis ug katarung sa ilang pagpuyo sa kalibutan. Dili gusto sa mga tapok tapok. Apan diya numero unong matinabangon sa magahangyo sa iyang kaluoy. Barugan ang iyang pulong ug igmat ang iyang salabutan. Kon makahigayon sa pagtunob sa tag-as nga tunghaan. Siya mosidlak ibabaw sa iyang mga kauban. Kutob sa iyang hibasahan tagsa ray dili niya masaulo.
Kumpas ng mamulong. Ang manggula sa iyang baba pulos undanon nga makadani sa kataha ug kaintap sa tanang mamati kaniya. Maayong mobugno sa kalisdanan. Mopahiyum sa taliwala sa kaparutan sa iyang mga tinguha. Samtang buhi pa siya malagmit makab-ut niya kutob sa iyang tinguhaon gumikan kay dili siya molunga sa paggamit sa iyang kusog ug utok.
Huyang siya alang sa babaye. Daghan siyang pinaangkan. Apan ang iyang mga anak sa gawas iyang angkunon ug hatagan ug kwarta. Abuton siya sa makalilisang sakit inig 30 niya. Kon kaluy-an siya ni Bathala, mopahimulos siya sa iya kinabuhi hangtud 85 nga panuigon.
ALANG SA BABAYE
Ang babaye nga matawo atol sa pagsilang ning bituona, hinigugma sa iyang mga kahigala-an paryente ug mga ginikanan tungod sa iyang guwatsi nga lisud tupngan, Mahigugmaon siya sa pamisti nga magilawgilaw ug gusto usab sa sayaw ug awit. Mahigugmaon sa malipayong kinabuhi ug tungod niini dili siya paiwit sa mga bahan-bahan sa kadalagahan ug kaulitawhan. Ang ilang kaanyag sa panagway ug kamadanihon sa ilang taras maoy makakabig sa daghang mga maghahalad.
Tungod sa ilang pagkahimili sa lalaki nga ilang higugmaon, dugay silang maminyo apan kon ma katunob na gani sa salag sa kaminyoon magpusot pusot ang anak.
Maoy nahisignus kaniya ang sakit sa tiyan, kalibag dugo ug uban pa. Aron paglikay ning balatiana, gikinahanglan nga ang babaye nga matawo atol ning bituona magbantay sa pagkaon ug dili magpasagad. Masakit siya sa mata ug tutonlan ug gikatahapan nga kining sakita maoy makahimo kaniyang alaut apan kon maluwas siya ning hatag sa Dios, makaabut siya sa kagulangon nga 77 ka tuig; sa katapusan maluluy-on nga inahan ug mahadlokon nga asawa.
Ang tanang adlaw nga mahiatol sa pagsilang ning bituona maayong ipangabli sa bisan unsang patigayon, mabugnaw nga panahon alang sa bata nga mosulod sa tunghaan; maayong adlaw isulod sa pagkakawan sa mga buhatan balay sa patika yon. Maayong ipanaw sa mga layong dapit ug dunay mawala ning adlawa masayon nga pangitaon.