Related Stories
ALANG SA LALAKE
Ang lalake nga matawo atol sa pagsilang ning bituona, dautan ug gawi ug pamatasan, tigmuro, bakakon nga isabut, huwabon, tigpalabong ug sulti, guwatsinango ug tampalasan, kaliwat sa mga kiriwan, himabaye ug tungod niini magaantus siya sa dautang sakit nga makapanlimbawot sa balahibo; ginasahan sa maayong ulo alang sa sugal ug sa mga buhat ug pinaagi sa lipat-lipat.
Anad sa tinonto ug sa bisan unsang hiwing paagi ug samtang gamay pa, maoy mahimong pangulo sa mga kawat-kawat nga ginagmay, pangiriw sa mga butang sa silingan ug kon modaku na ug magatubo nga dili inagak sa mga ginikanan, mahimong tulisan nga numero uno nga kaaway sa katilingban.
Hidakdakan siya sa mga mabug-at ug kini maoy magahatod kaniya sa kamatayon, apan kon maluwas man gani siya ning kastigoha, maabut niya ang 62 ka tuig.
••LALAKE••
Ang batang lalake nga motungha sa kalibutan sa pagsilang sa Bitoon Scorpion. Kinganlan nga alaut. Sanglit nahisulat sa iyang palad nga sudlan niya hapit ang tanang kahilayan ug kasal-anan sa yuta. Kinahanglan nga magbantay kaniya pag-ayo ang iyang ginikanan. I-ampo siya sa Diyos aron motipas ang iyang dalan gikan sa kahilayan ngadto sa katarung. Kutob sa makapuling buhat nga iyang buhaton kinahanglan puohaon sa ginikanan.
Tag-as ug sulti, siya magpaila nga siya ang hari sa tanan. Abug lamang daw ang ubang tawo alang kaniya. Magpatakag yabit sa mga pulong huwabon ug makasamad sa kasingkasing sa laing tawo. Maayong mupatusotuso. Andakan. Ang kaigmat sa iyang utok gamiton lamang sa sugal ug pamabaye. Sa gamay pa magpadayag na sa salawayong paagi sa pagpangawat. Ilhon nga pangulo sa mga bata nga mahilabtunon sa butang sa laing tawo.
Kon tunay ang pag-ampo sa iyang ginikanan sa atong Manunubos. Ingon man kon manlibasug kining bataa sa pagbuhat sa dautang kinaiya. Siya mahimong tawo nga dungganon ug inila. Ang iyang kahait sa salabutan maoy hinagiban batok sa kaburong. Makab-ut niya ang hataas nga kaalam. Siya ikatudlo nga pagtulon-an sa mga ginikanan nga maibog sa iyang kabuotan ug kakuguhan. Kaaway niya ang mga buhat nga hiwi ug salbahis. Siya ang mangulo sa pagkumbati sa kahilayan. Hilumon apan konao nay musulti, paminawon sa uban tungod sa katin-aw ug kaundanon sa iyang pamulong. Makahupot siya sa dakung katungdanan sa mga balay patigayon kun buluhatan sa kagamhanan.
Kon siya dili mapitol sa ginikanan mahimo siyang bangis nga ulitawo. Kinsang bugtong tuyoao da ang pagbuong sa kadungganan sa kababayen-an. Apan kon dunggon sa Diyos ang pag-ampo sa iyang inahan. Siya ilog-ilogan sa kadalagahan, kay ambungan man siya ug dili mapasipad-on sa kaputli sa babaye.
Malagmit siya hihulgan o hidat-ugan sa mga mabug-at. Busa siya maglikay aron siya maluwas sa kalit na kamatayon. Modangat siya sa ika 67 ka tuig na panuigon.
ALANG SA BABAYE
Ang babaye nga matawo atol sa pagsilang ning bituona kusganon, maisog ug dili ambongan, makigsandurot ug daghang mga higala nga makatabang kaniya pagkaplag ug katigayonan sa panginabuhi. Diyutay ra siyag maghahalad, apan kining pila ka pudyot nga mangabuang sa iyang ka ambong makatabang kaayo sa iyang patigayon,
Daghang samad ang iyang maantus ug kon maluwas siya nini ug pagabuhayon pa siya, pa gadag-on niya ang mga bituon tungod sa iyang kinaadman. Kon kusog ang iyang naturalisa maabut niya ang kagulangon nga 77. Maayong inahan, apan dili sandurot nga asawa.
••BABAYE••
Ang batang babaye nga matawo atol sa pagsidlak sa Bitoon Scorpion. Siya magasabak nga daan sa hamiling kaugmaon. Bulahan ang iyang matam-is nga kagawian. Sanglit daghan ang iyang kahigalahan nga maoy makabulig kaniya sa pagkaplag sa dakung katigayunan. Abunda sa kusog ang iyang kaugatan. Lagsik manlihok-lihok o manulti-sulti. Isog ang iyang nawong. Walay kaambong ang iyang panagway. Apan, maanghop ang iyang kasingkasing. Isipon siyang mutya sa iyang mga silingan ug higala. Matinabangon sa anaa sa kalisud ug kapaitan. Dili niya igsapayan ang salapi sa ngalan sa panaghigala.
Pipila ra kaulitawo ang madani pagpahayag sa gugma kaniya. Apan kining mga tawhana tinamud sa katilingban. Maayo'g pamarug ug katahaan. Kining babayhana dili maantigong muluib. Kon mahimong asawa. Siya dili gusto sa hilas-hilas sa atubangan sa kadaghanan. Masuko kon paraygan sa iyang bana sa atubangan sa mga tawo. Solundong asawa ug makugihong amahan.
Makatilaw siya sa daghang samad nga magagikan sa nagkalainlaing hinungdan. Kon makusog ang iyang naturaliza, mopuyo siya dinhi sa silong sa langit sulod sa 77 ka tuig.
Ang tanan nga adlaw nga mahitunong ning bituona, dautan alang niadtong kawad-an kay bisan unsaon ug pangita dili gayud hikit-an; dautan usab kini niadtong mga tawo nga naghunahuna sa pagpangayo ug katungdanan kay mapakyas gayud sa usa ka pulong dautan kining adlawa nga ipangama sa mga punoan sa lungsod kon sa mga pangulo sa mga buhatan sa patigayon kay dili ga yud pagapurong-purongan sa mga lukong sa kadaugan. Dautan usab kini nga ipanakayan kay makusog ang bawod, mabangis ang hinuros sa hangin, wala usay pulos kining adlawa nga ilakip sa mga lulantugi kay malagmit nga mosangko sa dakung away ug kaagasan ug dugo.