Related Stories
ALANG SA LALAKE
Ang bata nga lalake nga mahiatol sa pagsilang ning bituona, nagdala ug daghang kinaadman gawas sa pagkabuotan, matinahuron, maayog gawi ug pamatasan, mahait ug salabutan, masiaw kaayo apan dali ra usab nga masuko. Manggiulawon siya ug tungod niini dili siya makahupot ug hataas nga katungdanan. Kasarangan ra ang iyang panginabuhi ug kini iyang makab-ut tungud sa iyang pagkamakugihon.
Maayong higala ug dili maantigo mobudhi ug magapaila sa iyang paglaban bisan kon kanang buhata makahatag kaniya ug daghang mga kaaway. Piligro kaniya ang mga mananap nga sungayan ug kon dili niya paglikayan, maoy mahimong ginikanan sa iyang daghang mga balatian nga ma lagmit mahitabo kaniya sa magkagulangon siyag 22. Kon dili siya magpasagad maabut niya ang 75 ka tuig ug sa katapusan maayong amahan ug mahigugmaon nga bana.
••LALAKE••
Ang lalake nga bata nga matawo sa inigsubang sa Bitoon Aries. Natingban sa kakugi sa pagdumdum sa iyang mga buluhaton adlaw-adlaw. Kinasingkasing ang iyang pagtrabaho. Sa ingon niini, malinawon ang iyang pagpuyo. Apan, pagbuot sa palad nga dili siya daling mabahandion. Usa ka makahimo niyang dato sa kaulahian.
Sa iyang kabatan-on, siya mangguiolawon. Maulaw mopahayag sa iyang gugma. Kon ang babaye nga makasabut sa iyang gibati, magpakita ug gusto kaniya ug mohatag usab ug dalan ang makabaton sa iyang kaisog sa pagtukas sa iyang baba aron sa paghikyad sa iyang gugmang tim-os. Apan kon ang babaye mopaidlas-idlas, kining lakeha moidlas usab. Bisan unsa pa kadaku sa iyang gugma dili mogukod sa babaye. Kon mangitag higayon nga makasulti siya sa iyang tuyo. Siya mahigugma wala nay liso-liso ang hunahuna. Ang iyang panumpa mosangpot gayud sa atubangan sa pari.
Buotan siya ug matinahuron, malantip ang salabutan. Tigtiaw apan dili buot sa hilabihang tiaw, malagmit masuko. Tawo nga wala makaila ug pagbudhi sa iyang kahigalahan. Siya modapa kanimo ang tibuok niyang kinabuhi manalipod kanimo.
Maayong maglikay sa kabaw ug baka kay signus niya ang sungay sa hayupan. Sa panuigon 22 ihinagbo niya ang mapait na balatian. Kon mag-ampo lang siya ni Bathala ug magtapat sa iyang lihok. Makatagamtam siya sa kagulangon nga 75 ka tuig. Mapinanggaon sa iyang kapikas sa kinabuhi ug maayong moatiman sa kaugmaon sa iyang mga liwat.
ALANG SA BABAYE
Ang babaye nga matawo sa pagsilang ning bituona dili ambongan ni madanihon kay isganon ang iyang panagway, magahig kasingkasing. Kugihan, maabtik siyag lawas ug madaling makakat-on sa mga buhat bisan mag malisud. Dautan ang palad nga iyang maangkon kay kon maminyo, mabiyuda siya. Kanunay siyang nagamulo sa kaul-ul sa iyang tiil ug ulo kon magkagulangon na siyag 14. Walay daku nga balatian nga moabut kaniya gawas sa gihisgutan sa itaas apan kinahanglan nga iyang pagalikayan. Kon makusog ang iyang "naturaliza" modangat siya sa 75 ka tuig nga kagulangon ug sa katapusan, maluluy-on nga inahan apan bikil nga asawa.
••BABAYE••
Ang batang babaye nga mogula sa hayag sa kinabuhi atol sa pagsilang sa Bitoon Aries. Tugob sa kapiskay ang lawas. Ang iyang kamot daw gihimo alang sa trabaho. Sayon tudluan sa mga buluhaton. Kon makapaniid lang siya sa usa lang ka higayon sa usa ka tawo nga magbubuhat. Sa sunod higayon siya mahibalo na dayun nianang buhata. May pagka laken-on siya, malison ang iyang lawas. Wala siya'y madanihon na maanyag sa babaye, may pagkaisog ang iyang panagway ug panulti sulti. Dili kuyapan kon magtan-aw siya sa dugong mag-agas sa samaran kay matig-a ang iyang balatian.
Sa iyang pagkadalaga, ang mga ulitawo dili mo asi-asi pagdotdut kaniya kay pintok ang iyang pinulungan. Tagsa ray sulti motubag dayun. Apan ibabaw niining tanan, aduna siya'y malumong kasingkasing ngs nagtipig sa tinuod nga gugma sama sa ubang babaye. Malipay siyang mamati sa mga amoral ingon man sa pagtubag. Kon imo siyang haranahan, ayaw pagbinuangi sa kanta aron dili ka hibalikasan o higukdan.
Kon maminyo, mahimong maayong asawa basta ayuhon lang sa pagdala sa iyang bana. Kay kon dili, siya numero unong bagutbotan nga asawa. Kinahanglan maglikay siya sa kadautan. Madangat niya ang 75 ka tuig kon mabaskog lang ang iyang naturaliza.
Maayong isugod sa mga (buluhaton labina sa mga buhat nga maoy gisaligan panginabuhi kay mosangput gayud sa kaayohan. Maayo usab kining adlawa ipamalit kay kon ibaligya madali mahalin. Maayong ilangyaw sa kalungsoran basta dili lang motabok sa dagat ingon man nga maayong adlaw ipangama sa punoan sa lungsod aron pagkab-ut ug katungdanan. Maayong iluyong sa bisan unsang binhia ingon man maayong ipamogas kay dali rang mamuso ug mahalayo sa dulon. Dautan kining adlawa sa pagpatupi sa mga batang babaye ingon man sa pagpanghimungot kay dali rang masamad. Way pulos kining adlawa sa pangu litawo kay madali nga kasab-an sa inahan kun amahan.