Related Stories
ALANG SA LALAKE
Ang lalake nga matawo sa pagsilang ning bituona matambok, dili masakiton sa lawas mapa ubsanon, malipayon ug maluluy-on niadtong makaluluoy nga tan-awon labina niadtong mga makililimos. Makakab-ut ug dakung katungdanan ug maayong motabang niadtong mga makasasala labina sa sala nga pagpatay, pangawat, kagubot ug uban pa.
Maayo sa iyang mga higala, maayo motaho sa mga sekreto ug moamping sa panag-abyan bisan kon mamiligro ang iyang kinabuhi, kadungganan ug katigayonan. Maayo usab moila sa iyang kaugalingon nga butang. Kon maminyo daghan ug mga anak ug ang iyang mga anak makahupot usab dakung katungdanan sa lungsod ug sama sa amahan, matinabangon sa mga kabus, Piligro kaniya ang kalayo ug tubig ingon man ang puthaw ug magaantus sa daghang balatian ug kon maluwas siya ning balatiana, maabut niya ang kagulangon 76 ug sa katapusan maayong amahan apan dili makisanduroton nga bana.
••LALAKE••
Ang batang lalake nga matawo dungan sa pagsubang sa Bitoon Cancer. Kining bataa halayo sa mga sakit, malison ang lawas. Matawa ug malipayon. Kon takboyan sa bisan unsang sakit, basta madali lang sa doctor ug tambal maluwas dayon.
Dili tigbugal bugal ug palabi labi. Ang tawo nga anaa sa kagul-anan dili niya tamayon. Iya hinoon nga tabangan kutob sa maabot. Ang tawo usab nga abuton sa disgrasya. Ingon man sa mga babaye nga mapaangkan, iyang kaloy-an ug dili niya pabation sa pagyubit o pagtamay. Badlungon niya kadtong mga tawo nga tiglibak ug matamayon sa gikabsan sa maayong kapalaran. Alang kaniya ang kalibutan kinahanglan mahusay kanunay ug ang sa mga tawo kinahanglan aduna sa pasaylo sa makasasala.
Sa iyang pagpangitag salapi Iyang ginaapil ang galastusan alang sa limos. Molimos siya sa tanag mga timawang abuton sa kadaut. Kon imong ihinagbo sa dalan, bisan hari o sapian pa kaayo ang iyang kuyog ug ikaw usa ka niya higalang kabos, tuho-i siya motimbaya kanimo sama sa naandan kaniya.
Siya maayong manalipod sa iyang katigayunan ug katungdanan. Matinabangon sa mga higala nga mahitumpawak sa kalisdanan. Ingon man sa mga tawo nga apikihon pagpakig-away sa ilang mga kaaway.
Kasaligan sa mga tinaguan. Kon siya mahibalo nga ang imong tinaguan, mao kini ug mao kadto. Siya muhilom lamang ug dili manabi. Moabot siya sa panuigon 26 ka tuig. Kon malatas niya ang dili maisip nga balatian nga mohulga kaniya. Ang iyang kinabuhi mamiligro sa kalayo, tubig ug puthaw.
ALANG SA BABAYE
Ang babaye nga matawo atol sa pagsilang ning bituona, hingatawa, makabibihag ug panagway ambongan ug barug, saba-an, makinaadmanon ug tig komidya. Kadaghanan sa mga babaye nga ma tawo ning adlawa, mahigugmaon sa awit ug mga dula sa entablado. Mahigugmaon motan-aw sa mga butang na maanindot ug tungod niini ulipon siya sa maayong pamiste. Malisud nga sabton ang ilang mga hunahuna ug tungod niini kon maminyo man ugaling halayo sa kalipay ang ilang panimalay. Gusto sa langyaw ug dili mahimutang hangtud nga makakita ug laing talan-awon sa laing dapit.
Wala siyay mga dagkong balatiang bation ug ang iyang kinabuhi dili pagamansahan sa bisan diyutayng uwat sa sakit. Kon makusog ang iyang. naturaliza madangat niya ang kagulangon nga 72, ug sa katapusan sabaan nga inahan ug bikil nga asawa,
••BABAYE••
Ang batang babaye nga mahimugso atol sa pagsilang sa Bitoon Cancer. Sagad nga mahimong dungganang magdudumala. Ambongan ug mapahiyumon ang publiko nga magsud-ong kaniya. Abuton gayud sa kahimuot. Aduna siya'y matahum tingog. Dili kapuyan makigtabi. Bisan unsay butang iyang isulti sa iyang ikaatubang. Lamian gayud mamati. Ampay niya ang mga sapot ug butang nga mahal ug tahum.
Ang makasusubong bahin sa iyang kinabuhi mao nga ang mga lalake daw dili makasabot sa iyang kinaiya ug tungod niini, siya dili dugokon sa maghahalad. Malagmit dili siya maminyo. Kon mahisulod man siya ugaling sa kaminyoon, dili siya tugob sa himaya. Mahigugmaon sa panaw sa lagyong dapit.
Kon magkasinabot lamang siya ug ang iyang bana. Siya ang labing pinangga nga asawa. Siya maayong uyon-uyunan sa iyang mga hunahuna. Kinahanglan ang iyang mabana, magtuon pag ayo sa iyang kinaiya aron walay kagubot ang panimalay. Ang kabugnaw sa buot sa bana ang makapalutaw sa himaya.
Kining adlawa maoy maayong isugod sa pag buhat sa mga bulohaton kay madaling mahuman, maayong isugod pagbukas sa mga tun-haan kay halayo sa mga kadaut ang mga mata; maayo usab isugod sa pagsulat sa mga basahon ingon man mga maayong igadawat ug mga tambag sa mga makinaadmanon apan dili maayong ibulong sa mga masakiton kay kulang sa duga ang tambal.