Related Stories
ALANG SA LALAKE
Matam-is ug kagawian ingon man malumog kasingkasing ug pagbati, ang tanang lalake nga mahiatol sa pagkatawo sa pagsilang ning bituona manggihatagon ug maayo kaayo sa iyang isigkatawo ug walay yango-yango sa iyang mga sagabay kun kahigalaan nga dili niya tagdon, apan malisud usab nga limbongan kay mobalus gayud hangtud sa pagkaugtas sa malimbongon. Katahaan ang iyang panagway kahadlokan ang pamarug apan dili mapalabilabihon; mahimong adunahan tungod sa iyang pagkamakugihon ug, maatimanon sa iyang mga butang.
Madali siyang kasamaran sa iyang mga higala ingon man nga dali rang matalinggab kon mag lakaw sa kaingin, busa kinahanglan magbantay siya ning mga kadauta. Piligro usab kaniya ang mga malala nga mananap ingon sa agoyangyang kayag-ang ilabi na gayud sa irong buang. Gidili usab kaniya ang pagkaligo sa dagat kay malagmit nga kalambrihon ang iyang lawas ug kon dili hitabangan mao ang katapusan sa iyang kinabuhi.
Upat ka dakung hut-ong sa balatian moabut kaniya ug makagawas na siya ning mga balatian kon moabut na ang iyang kagulangon ug katloan ug tulo ning kagulangona anhi magsugod ang iyang maayong lawas, karon magbantay lang siya sa pagabuhaton ug ampingan niya ang iyang panglawas, moabut siya sa kagulangon nga kan-uman ug pito (67) ug sa katapusan mahigugmaon nga bana ug malipayong amahan.
ALANG SA BABAYE
Ang mga batang babaye nga mahiatol sa pagkatawo sa pagsilang ning bituona mabination, apan tungod sa pagkamabalhinon sa ilang hunahuna madali ra nga mausab ang ilang pagbati. Mga himasa ug mahigugmaon sa awit ug mapatuyangon sa ilang gusto, gawas pa sa dili makanunayon, mao kini ang kinaiya taras ug pagbati sa bata nga makakita sa kahayag sa kalibutan ning mga adlawa. Mga dakung kagubot ihibalag nila ug kining kasamoka nagagikan sa panaghigugmaay.
Kon maminyo madaghan ug anak, apan dili mga malipayon tungod sa kanunay nga bigniay sa amahan ug inahan. Halayo sa kalinaw ang ilang panimalay ug tungod niini ang ilang mga anak dili makakab-ut ug dakung katungdanan tungod sa kakulang sa pag-amoma ug pagtudlo.
Maoy maangkon nga signus ning mga bata-a ang kahulog gikan sa mga hatag-as nga kahoy ug uban pa. Tagaan sa maayong lawas ug kon makusog ang iyang naturaliza máabut niya ang ka gulangon nga 87 ka tuig ug sa katapusan mapala bilabihon nga inahan ug dili mahigugmaon nga asawa.
Kining mga adlawa maayong ipamalit ug karnero, kanding, baboy, gawas sa mga baka, kabaw, kabayo. Ang mga nahiunang mananap dali ra kaayong mosanay ug madaghan samtang ang kabaw, baka ug kabayo dali ra nga mangamatay. Maayong ipamasol kon ipangita ug maayo usab nga ilangyaw sa lagyong dapit; ingon man nga maayo usab nga itawon ngadto sa laing balay ug dautan usab, niadtong mga tawo nga masamad sa hinagiban ug tungod sa kala-a dugay nga maalim ug malagmit nga saw-on sa laing sakit.